《人情與帛金》
仲記得我寫第一個故事《那天，我出席了一個葬禮》，一個係參加者，一個係家屬，感覺完全唔同，一天內好多親戚朋友都抽空出席，仲記得細個少不更事口沒遮攔，經常用帛金啊，過身啊等等說話去開玩笑，去罵人，當經歷過喪事後，我諗都唔會有人會再用呢種說話開玩笑。
當晚返到屋企沖完涼都十二點左右，然後一家人坐係度點算帛金，情景好似我當年結婚之後點算人情一樣，某程度，兩種錢都係一種祝福，一種情誼。
我諗人情有公價，帛金我從來都無聽過公價，錢，從來都唔係一個衡量友情同價值嘅標準，每一個有到場嘅送行朋友，我都覺得好足夠，人離開，錢財都係留低，如果細佬佢知道有來，相信都好感激了，作為親人，收到帛金，真係無論多少，都覺得好有心了。
一路點數記數，一個個人名，大概講得出係細佬同學、同事、好兄弟、好朋友等等，然後睇個銀碼，心中真係有好大感概，唔少人做到501以上，甚至1001，2001，3001等等，呢份情，我地真係唔知點還，每次一打開個信封見到做好多帛金既人，我都會問下佢係邊個，我媽有時都會講得到係邊個，因為細佬佢病既時間都好多人黎探過佢，佢都認得唔少人。
我問咗我自己嘅朋友，如果我死咗，你會做幾多帛金比我？
佢話，帛金又唔係俾你，俾你屋企人嘛，經濟唔好親人少又或者有小朋友嘅就做多d，如果你好好地嘅一係501，一係1001啦，就好似做人情比你，知你結婚用好多錢，咪做得大份d幫下你手，講真，大家咁熟，有乜都在心中啦，仲用錢去計咩？到時，你記得我住邊，七日裡面，有好酒飲，有好野食，我打住機等你嚟搵我啊。
我話，你記得整個朋友追思會，大家成晚講吓我做過咩柒事，有咩好同唔好嘅回憶，做吓我哋以前會做嘅事，我見到會好開心。
佢話，放心，一定齊人！
我再問，咁如果你做得好重手俾我，會係咩原因呢？
佢話，咁……我應該係好唔捨得你喇，肉痛吓，個心無咁痛掛。
－－－－－－－－－－－－－－－－－－－－－－－－－
《弊傢伙，我女朋友有咗》經已上架，有興趣的朋友歡迎點擊下列連結購買。
預購 BY Payme, FPS, Alipay連結：https://forms.gle/UEdH32PfVD2cp5nK6
預購By 掌鋪，可以使用Visa Master Card連結：
https://maydreaming.boutir.com/i/WDnmnPAAA
舊作《那天，我出席了一個葬禮》《同學會重遇的那個人》《南極》亦可以同時購買，有興趣的可留言式inbox查詢
Search